Times of America
A Panorama of Political, Social, Cultural and Heritage of East and West
Times of America
is a periodical News on
Monthly
. It is a panorama of Political, Social, cultural and heritage of East and West.
2024 August
Previous Issues
2025 ജൂലൈ 09
ന്യൂസ് കോര്‍ഡിനേഷന്‍:
ജോയിച്ചന്‍ പുതുക്കുളം; പി.പി.ചെറിയാന്‍
14 രാജ്യങ്ങളുടെ തീരുവ പട്ടികയില്‍ ഇന്ത്യയില്ല; ഇന്ത്യ യുഎസ് വ്യാപാര കരാറിന് ധാരണയെന്ന് ട്രംപ്
വാഷിംഗ്ടണ്‍: ഇന്ത്യയുമായുള്ള വ്യാപാര കരാറിന് ഏതാണ്ട് ധാരണയായെന്ന് അമേരിക്കന്‍ പ്രസിഡന്‍റ് ഡൊണാള്‍ഡ് ട്രംപ് വെളിപ്പെടുത്തി. 14 രാജ്യങ്ങള്‍ക്ക് തീരുവ ചുമത്തി കത്ത് നല്‍കിയപ്പോള്‍ ഇന്ത്യയുടെ പേര് ഒഴിവാക്കിയതിന്‍റെ കാരണം വിശദീകരിക്കവെയാണ് ട്രംപ് ഇക്കാര്യം പങ്കുവെച്ചത്. വിസ്കി, വാഹനങ്ങള്‍, ബദാം, ഇലക്ട്രോണിക് ഉപകരണങ്ങള്‍, പാവകള്‍ തുടങ്ങിയ അമേരിക്കന്‍ ഉല്‍പ്പന്നങ്ങള്‍ക്ക് ഇന്ത്യയില്‍ തീരുവ കുറച്ച് വിപണി തുറക്കാന്‍ ധാരണയായതായി സൂചന. എന്നാല്‍, കാര്‍ഷിക ക്ഷീര ഉല്‍പ്പന്നങ്ങളുടെ കാര്യത്തില്‍ ഇന്ത്യ വിട്ടുവീഴ്ചയ്ക്ക് തയ്യാറായിട്ടില്ല. ഇന്ത്യയില്‍ നിന്നുള്ള തുണിത്തരങ്ങള്‍, ചെരുപ്പ് എന്നിവയ്ക്ക് അമേരിക്കയും തീരുവ കുറയ്ക്കും. ജപ്പാന്‍, ദക്ഷിണ കൊറിയ ഉള്‍പ്പെടെ 14 രാജ്യങ്ങള്‍ക്ക് 25 മുതല്‍ 40 ശതമാനം വരെ തീരുവ ചുമത്തുമെന്ന് ട്രംപ് പ്രഖ്യാപിച്ചിരുന്നു. എന്നാല്‍, ഇന്ത്യ യുഎസ് വ്യാപാര കരാര്‍ ഉടന്‍ യാഥാര്‍ത്ഥ്യമാകുമെന്നതിനാല്‍ ഇന്ത്യയ്ക്ക് ഈ തീരുവ ബാധകമാകില്ല. ബ്രിക്സ് രാജ്യങ്ങള്‍ക്ക് 10 ശതമാനം അധിക തീരുവ ഈടാക്കുമെന്ന ട്രംപിന്‍റെ ഭീഷണി തല്‍ക്കാലം നടപ്പാകില്ലെന്ന് അമേരിക്കന്‍ ഉദ്യോഗസ്ഥര്‍ വ്യക്തമാക്കി. ബ്രിക്സ് അമേരിക്കന്‍ വിരുദ്ധ നീക്കങ്ങള്‍ നടത്തുന്നുവെന്ന ആരോപണം റഷ്യയും ചൈനയും നിഷേധിച്ചിരുന്നു. ഇന്ത്യ ഇതുവരെ ബ്രിക്സ് വിഷയത്തില്‍ അമേരിക്കന്‍ നിലപാടിനോട് പ്രതികരിക്കാത്തത് ശ്രദ്ധേയമാണ്. കാര്‍ഷിക ഉല്‍പ്പന്നങ്ങള്‍ വ്യാപാര കരാറില്‍ ഉള്‍പ്പെട്ടാല്‍ പാര്‍ലമെന്‍റ് സമ്മേളനത്തില്‍ വന്‍ പ്രതിഷേധം ഉയര്‍ത്താനാണ് കോണ്‍ഗ്രസിന്‍റെ തീരുമാനം. വ്യാപാര കരാറിന്‍റെ വിശദാംശങ്ങള്‍ സംബന്ധിച്ച് ഇന്ത്യ ഔദ്യോഗികമായി പ്രതികരിച്ചിട്ടില്ല. എന്നാല്‍, ധാരണയായ ഉല്‍പ്പന്നങ്ങളുടെ കരാര്‍ ഉടന്‍ ഒപ്പുവെക്കുമെന്നാണ് ട്രംപിന്‍റെ സൂചന. ഇന്ത്യയുമായുള്ള വ്യാപാര ബന്ധം ശക്തിപ്പെടുത്തുന്നതിന്‍റെ ഭാഗമായി ഈ കരാര്‍ നിര്‍ണായകമാകുമെന്നാണ് വിലയിരുത്തല്‍.
ഓര്‍ത്തഡോക്സ് ഫാമിലി കോണ്‍ഫറന്‍സ് തുടക്കം - ഉമ്മന്‍ കാപ്പില്‍, ജോര്‍ജ് തുമ്പയില്‍
സ്റ്റാംഫോര്‍ഡ്: ആത്മീയ നവീകരണത്തിന്‍റെ ചൈതന്യത്തോടെയും മണ്‍മറഞ്ഞ പിതാക്കന്മാരുടെ വിശ്വാസം ഉയര്‍ത്തിപ്പിടിക്കാനുള്ള ആഗ്രഹത്തോടെയും, മലങ്കര ഓര്‍ത്തഡോക്സ് സഭയുടെ നോര്‍ത്ത് ഈസ്റ്റ് അമേരിക്കന്‍ ഭദ്രാസനം ഇന്ന് ഹില്‍ട്ടണ്‍ സ്റ്റാംഫോര്‍ഡ് ഹോട്ടല്‍ ആന്‍ഡ് കണ്‍വെന്‍ഷന്‍ സെന്‍ററില്‍ ഫാമിലി ആന്‍റ് യൂത്ത് കോണ്‍ഫറന്‍സ് ഉദ്ഘാടനം ചെയ്യും. നാല് ദിവസം നീളുന്ന കോണ്‍ഫറന്‍സ് കേരളത്തനിമയും സഭാ പാരമ്പര്യവും വിളിച്ചോതുന്ന മഹത്തായ ഘോഷയാത്രയോടെ ആരംഭിക്കും. തുടര്‍ന്ന് ഗ്രാന്‍ഡ് ബാള്‍റൂമില്‍ പൊതുസമ്മേളനത്തോടെ കോണ്‍ഫറന്‍സിന്‍റെ ഔപചാരികമായ തുടക്കമാവും. വിശ്വാസം ആഴപ്പെടുത്തുന്നതിനും ആത്മീയ പുനരുജ്ജീവനത്തിനുമുള്ള സമയമാണ് കോണ്‍ഫറന്‍സ് എന്ന് ഭദ്രാസന മെത്രാപ്പോലീത്ത സക്കറിയ മാര്‍ നിക്കളാവോസ് വിശേഷിപ്പിച്ചു. ഭദ്രാസന മെത്രാപ്പോലീത്തായുടെ ആത്മീയ നേതൃത്വത്തിലും ഭദ്രാസന കൗണ്‍സിലും ഫാമിലി കോണ്‍ഫറന്‍സ് കമ്മിറ്റിയും ഏകോപിപ്പിച്ചു സംഘടിപ്പിക്കുന്ന ഈ കോണ്‍ഫറന്‍സില്‍, ഭദ്രാസനത്തിലുടനീളമുള്ള വൈദികരും വിശ്വാസികളും വളരെ പ്രതീക്ഷയോടെ പങ്കെടുക്കുന്നു. മലങ്കര ഓര്‍ത്തഡോക്സ് വൈദിക അസോസിയേഷന്‍റെ ജനറല്‍ സെക്രട്ടറി ഫാ. ഡോ. നൈനാന്‍ വി. ജോര്‍ജ്, നോര്‍ത്ത് ഈസ്റ്റ് അമേരിക്കന്‍ ഭദ്രാസന സണ്‍ഡേ സ്കൂള്‍ ഡയറക്ടര്‍ ഫാ. ഡോ. തിമോത്തി (ടെന്നി) തോമസ്, സൗത്ത് വെസ്റ്റ് അമേരിക്കന്‍ ഭദ്രാസന യൂത്ത് മിനിസ്റ്റര്‍ ഫാ.ജോണ്‍ (ജോഷ്വ) വര്‍ഗീസ്, തല്‍മീഡോ മിനിസ്ട്രി ഡയറക്ടര്‍ ഡീക്കന്‍ അന്തോണിയോസ് (റോബി) ആന്‍റണി തുടങ്ങിയവര്‍ നേതൃത്വം നല്‍കും. കൂടുതല്‍ വിവരങ്ങള്‍ക്ക്: ډ ഫാ. അബു വര്‍ഗീസ് പീറ്റര്‍, കോണ്‍ഫറന്‍സ് കോര്‍ഡിനേറ്റര്‍: (914) 806 4595, ജെയ്സണ്‍ തോമസ്, കോണ്‍ഫറന്‍സ് സെക്രട്ടറി: (917) 612 8832, ജോണ്‍ താമരവേലില്‍, കോണ്‍ഫറന്‍സ് ട്രഷറര്‍ (917) 5333566.
ഗീവര്‍ഗീസ് മാര്‍ അപ്രേം ഡിട്രോയിറ്റ് സെന്‍റ് മേരീസ് ക്നാനായ കത്തോലിക്ക ഇടവക സന്ദര്‍ശിച്ചു - ജെയിസ് കണ്ണച്ചാന്‍പറമ്പില്‍
ഡിട്രോയിറ്റ്: ജൂണ്‍ 30 തിങ്കളാഴ്ച്ച കോട്ടയം അതിരൂപത സഹായ മെത്രാനും കോട്ടയം അതിരൂപതയിലെ മലങ്കര റീത്തിലെ പ്രഥമ മെത്രാനും കൂടിയായ ഗീവര്‍ഗീസ് മാര്‍ അപ്രേം ഡിട്രോയിറ്റ് സെന്‍റ് മേരീസ് ക്നാനായ കത്തോലിക്ക ഇടവക സന്ദര്‍ശിച്ചു. മലങ്കര റീത്തില്‍ വിശുദ്ധ കുര്‍ബ്ബാന അര്‍പ്പിക്കുകയും വിശുദ്ധ കുര്‍ബ്ബാനയ്ക്കു മുഖ്യ കാര്‍മ്മികത്വം വഹിക്കുകയും ചെയ്തു. ക്നാനായ റീജിയന്‍ വികാരി ജനറാളും ബെന്‍സന്‍വില്‍ ക്നാനായ കത്തോലിക്ക ഫൊറോനാ ഇടവക വികാരിയുമായ റവ.ഫാ. തോമസ് മുളവനാല്‍, ഡിട്രോയിറ്റ് സെന്‍റ് മേരീസ് ക്നാനായ കത്തോലിക്ക ഇടവക വികാരി റവ .ഫാ. ജോസഫ് തറയ്ക്കല്‍, ഡിട്രോയിറ്റ് സെന്‍റ് ജോസഫ് സീറോ മലങ്കര ഇടവക വികാരി റവ.ഫാ. പത്രോസ് പാനുവേല്‍, ചിക്കാഗോ സെന്‍റ് മേരീസ് ക്നാനായ കത്തോലിക്ക ഇടവക വികാരി റവ.ഫാ. സിജു മുടക്കോടില്‍ എന്നിവര്‍ സഹകാര്‍മികത്വം വഹിച്ചു. തുടര്‍ന്നു പാരീഷ് ഹാളില്‍ സ്നേഹ വിരുന്നും നടത്തപ്പെട്ടു. ഇടവക വികാരി റവ.ഫാ.ജോസഫ് തറയ്ക്കല്‍ കൈക്കാരന്മാരായ സെബാസ്റ്റ്യന്‍ വഞ്ചിത്താനത്ത്, സേവ്യര്‍ തോട്ടം എന്നിവരോടൊപ്പം പാരീഷ് കൗണ്‍സില്‍ അംഗങ്ങള്‍ എല്ലാ കാര്യങ്ങള്‍ക്കും നേതൃത്വം നല്‍കി.
കെ.ഡബ്ല്യു കാര്‍ണിവല്‍ 30ന് മിസ്സിസാഗ കാംബ്രിഡ്ജ് ഫ്രഞ്ച് ക്ലബ്ബില്‍
മിസ്സിസാഗ: മലയാളി ഹെല്‍പ് സംഘടിപ്പിക്കുന്ന കെ ഡബ്ല്യു കാര്‍ണിവലിന് ഫ്ളാഷ് മോബോടു കൂടി വാട്ടര്‍ ലൂ പബ്ലിക് സ്ക്വയറില്‍ തുടക്കമായി. ഓഗസ്റ്റ് 30ന് കാംബ്രിഡ്ജ് ഫ്രഞ്ച് ക്ലബ്ബില്‍ രാവിലെ പത്ത് മുതല്‍ രാത്രി ഒമ്പത് വരെ ഡാന്‍സ് അക്കാദമികളുടെ ഡാന്‍സുകള്‍, കുട്ടികളുടെ ഡാന്‍സ് മല്‍സരം, ശിങ്കാരിമേളം, ഡി.ജെ, ഷോപ്പിങ്, ഓണച്ചന്ത തുടങ്ങി നിരവധി പരിപാടികള്‍ സന്ദര്‍ശകര്‍ക്കായി ഒരുക്കിയിട്ടുണ്ടെന്ന് സംഘാടകര്‍ അറിയിച്ചു. നാലായിരത്തിലേറെ പേര് പങ്കെടുക്കുമെന്ന് പ്രതീക്ഷിക്കുന്ന ഈ കാര്‍ണിവലില്‍ എല്ലാ മലയാളികളുടെയും പിന്തുണ ഉണ്ടാകണമെന്ന് മലയാളി ഹെല്‍പ് അഭ്യര്‍ഥിച്ചു.
ഐ.പി.സി ഫാമിലി കോണ്‍ഫ്രന്‍സ്: ചരിത്ര മുഹൂര്‍ത്തത്തിന് സാക്ഷിയാകാന്‍ കാനഡ - നിബു വെള്ളവന്താനം
കാനഡ: ആല്‍ബര്‍ട്ടയിലെ എഡ്മന്‍റണിലുള്ള മനോഹരമായ റിവര്‍ ക്രീ റിസോര്‍ട്ടില്‍ ജൂലൈ 17 മുതല്‍ 20 വരെ നടത്തപ്പെടുന്ന 20-ാമത് ഐ.പി.സി ദേശീയ കുടുംബ സംഗമത്തിന്‍റെ ഒരുക്കങ്ങള്‍ പൂര്‍ത്തിയായി. ജൂലൈ 17 വ്യാഴാഴ്ച വൈകിട്ട് 6.30ന് നടത്തപ്പെടുന്ന പ്രാരംഭ സമ്മേളനം നാഷണല്‍ കണ്‍വീനര്‍ പാസ്റ്റര്‍ സാം വര്‍ഗീസ് ഉദ്ഘാടനം ചെയ്യും. വിശ്വാസികള്‍ക്ക് ആത്മീയ അനുഗ്രഹത്തിന്‍റെ ധന്യ നിമിഷങ്ങള്‍ സമ്മാനിക്കാന്‍ പാസ്റ്റര്‍മാരായ കെ.ജെ.തോമസ്, പി.ടി.തോമസ്, നിരൂപ് അല്‍ഫോണ്‍സ്, സിസ്റ്റര്‍ അക്സാ പീറ്റേഴ്സണ്‍, സിസ്റ്റര്‍ ഷൈനി തോമസ് തുടങ്ങിയവരെ കൂടാതെ വടക്കേ അമേരിക്കയിലും കാനഡയിലുമുള്ള മറ്റ് നിരവധി അനുഗ്രഹീത ദൈവദാസന്മാര്‍ സമ്മേളനത്തിലുടനീളം വിവിധ സെക്ഷനുകളില്‍ ദൈവവചനം ശുശ്രൂഷിക്കും. നാഷണല്‍ സെക്രട്ടറി ബ്രദര്‍ ഫിന്നി എബ്രഹാം, നാഷണല്‍ ട്രഷറര്‍ ബ്രദര്‍ ഏബ്രഹാം മോനീസ് ജോര്‍ജ്, യൂത്ത് കോര്‍ഡിനേറ്റര്‍ റോബിന്‍ ജോണ്‍, വുമണ്‍സ് കോര്‍ഡിനേറ്റര്‍ സിസ്റ്റര്‍ സൂസന്‍ ജോണ്‍സണ്‍ തുടങ്ങിയവരുടെ നേതൃത്വത്തില്‍ വിപുലമായ ക്രമീകരണങ്ങളാണ് നടന്നുവരുന്നതെന്ന് മീഡിയ കോര്‍ഡിനേറ്റര്‍ നിബു വെള്ളവന്താനം അറിയിച്ചു. കാനഡയില്‍ വച്ച് ആദ്യമായി നടത്തപ്പെടുന്ന കോണ്‍ഫ്രന്‍സ് ചരിത്രമുഹൂര്‍ത്തമാക്കുവാനും വിവിധ സംസ്ഥാനങ്ങളില്‍ നിന്ന് കടന്നുവരുന്ന ആയിരക്കണക്കിന് വിശ്വാസികളെ സ്വീകരിക്കുവാനും നാഷണല്‍ ലോക്കല്‍ തലത്തില്‍ പ്രവര്‍ത്തിക്കുന്ന വിവിധ കമ്മറ്റികള്‍ അക്ഷീണം പരിശ്രമിച്ചു കൊണ്ടിരിക്കുന്നു. ഇംഗ്ലീഷിലും കൂടാതെ ആദ്യമായി നടത്തപ്പെടുന്ന ഹിന്ദി സെക്ഷനുകളിലും അവിസ്മരണീയമായ മാധുര്യമേറുന്ന ആത്മീയ ഗാനങ്ങള്‍ ആലപിക്കാന്‍ബ്രദര്‍ ഷെല്‍ഡന്‍ ബംഗാരയുടെ നേതൃത്വത്തില്‍ മികച്ച ഗായക സംഘം സംഗീത ശുശ്രൂഷകള്‍ക്കായി എത്തിച്ചേരും. നാഷണല്‍ ക്വയര്‍ ലീഡേഴ്സായ ലിജോ മാത്യു, ജോണ്‍സ് ഉമ്മന്‍, സോണി വര്‍ഗീസ് എന്നിവരുടെ നേതൃതത്തില്‍ സ്റ്റെഫിന്‍, ഫിജോ, ജിനു, റെനി, സനീഷ്, ബിനോ, അനു എന്നിവര്‍ ഗാന ശുശ്രൂഷകള്‍ക്കു നേതൃത്വം നല്‍കുകും. ഐപിസി ഫാമിലി കോണ്‍ഫറന്‍സിന്‍റെ കഴിഞ്ഞ 20 വര്‍ഷത്തെ ചരിത്രം ഉള്‍പ്പെടുത്തിയ സുവനീര്‍ പ്രകാശനം ചീഫ് എഡിറ്റര്‍ രാജന്‍ ആര്യപള്ളിലിന്‍റെ അധ്യക്ഷതയില്‍ നടക്കും. അമേരിക്കന്‍ ഐക്യനാടുകളിലേക്ക് കുടിയേറിയ ഇന്ത്യ പെന്തക്കോസ്ത് ദൈവസഭ വിശ്വാസികളുടെ ഈ കൂടി വരവ് ഭാരതത്തിന് വെളിയില്‍ നടത്തപ്പെടുന്ന ഏറ്റവും വലിയ ഐപിസി സമ്മേളനം കൂടിയാണ്.
ഫൊക്കാന കേരളാ കണ്‍വെന്‍ഷന്‍ ചാരിറ്റി പ്രവര്‍ത്തനങ്ങളുടെ വിതരണ വേദി കൂടി ആകും - ശ്രീകുമാര്‍ ഉണ്ണിത്താന്‍
2025 ആഗസ്റ്റ് 1 മുതല്‍ 3 വരെ കോട്ടയത്തെ കുമരകം ഗോകുലം ഫൈവ് സ്റ്റാര്‍ റിസോര്‍ട്ടില്‍ വെച്ച് നടത്തുന്ന ഫൊക്കാന കേരളാ കണ്‍വന്‍ഷനു വേണ്ടിയുള്ള ഒരുക്കങ്ങള്‍ പുരോഗമിക്കുന്നു. ലോകത്തിലേക്കും ഏറ്റവും വലിയ മലയാളീ പ്രവാസി സംഘമായിരിക്കും ഫൊക്കാന കേരളാ കണ്‍വെന്‍ഷന്‍ എന്ന് പ്രസിഡന്‍റ് സജിമോന്‍ ആന്‍റണി അഭിപ്രായപ്പെട്ടു. മൂന്ന് ദിവസങ്ങളിലായി അരങ്ങേറുന്ന ഈ മഹാസമ്മേളനത്തിന്‍റെ ആദ്യ ദിവസം ലഹരിക്കെതിരെ ഉള്ള ഒരു വിളംബരത്തോട് കൂടി തുടങ്ങും. രണ്ടാം ദിനം ഫൊക്കാനയും കേരളാ യൂണിവേഴ്സിറ്റിയുമായി സഹകരിച്ചു നടത്തുന്ന ഭാഷക്ക് ഒരു ഡോളര്‍, സാഹിത്യ സമ്മേളനം, സാഹിത്യ അവാര്‍ഡുകള്‍, സാംസ്കാരിക അവാര്‍ഡുകള്‍, ബിസിനസ്സ് സെമിനാറുകള്‍, ബിസിനസ്സ് അവാര്‍ഡുകള്‍, വിമെന്‍സ് ഫോറം സെമിനാര്‍, വിമെന്‍സ് ഫോറം സ്കോളര്‍ഷിപ്പ് വിതരണം, നിരവധി ചാരിറ്റി പ്രവര്‍ത്തങ്ങളുടെ തുടക്കം, ഫൊക്കാനയുമായി സഹകരിച്ചു നടത്തുന്ന ലൈഫ് ആന്‍ഡ് ലിമ്പ് ചാരിറ്റബിള്‍ സൊസൈറ്റിയുടെ കാല് വിതരണം, മാധ്യമ സെമിനാര്‍, ഫൊക്കാന ഹൗസിങ് പ്രൊജക്റ്റ്, മെഡിക്കല്‍ കാര്‍ഡ് വിതരണം, പ്രിവിലേജ് കാര്‍ഡ് വിതരണം, മൈല്‍സ്റ്റോണ്‍ ചാരിറ്റബിള്‍ സൊസൈറ്റിയുമായി സഹകരിച്ചു നടത്തുന്ന ഫൊക്കാന സിം കേരള പ്രൊജക്റ്റിന്‍റെ സമാപനം തുടങ്ങി നിരവധി പ്രോഗ്രാമുകള്‍ ഉള്‍പ്പെടുത്തിയാണ് രണ്ടാം ദിവസത്തെ പരിപാടികള്‍. മൂന്നാം ദിവസം വിനോദത്തിനു വേണ്ടി മാത്രം മാറ്റിവെച്ചിട്ടുണ്ട്. 400 പേര്‍ക്ക് യാത്ര ചെയ്യാവുന്ന കുട്ടനാടന്‍ കായലിലൂടെയുള്ള ബോട്ടു യാത്രയാണ് ക്രമീകരിച്ചിട്ടുള്ളത്. കള്‍ച്ചറല്‍ പ്രോഗ്രാമുകള്‍ അവതരിപ്പിക്കുന്നത് പ്രസിദ്ധ സിനിമാതാരവും ഡാന്‍സറുമായ സരയൂ മോഹന്‍, സിനിമാതാരത്തോടൊപ്പം ഡാന്‍സറും അവതാരികയും കൂടിയായ അമല റോസ് കുര്യന്‍റെ നേതൃത്തിലുള്ള ഡാന്‍സുകള്‍, സിനിമ പിന്നണി ഗായകരായ ഏഷ്യാനെറ്റ് സ്റ്റാര്‍സിംഗര്‍ ജോബി, സിനിമ പിന്നണി ഗായകന്‍ അഭിജിത് കൊല്ലം, ഫ്ളവേഴ്സ് ടോപ് സിങ്ങര്‍ മിയക്കുട്ടി, സിനിമ പിന്നണി ഗായകനും മിമിക്രി താരവുമായ രാജേഷ് അടിമാലി തുടങ്ങിയവര്‍ അവതരിപ്പിക്കുന്ന വിവിധ കലാ പരിപാടികള്‍. കേരളാ കണ്‍വെന്‍ഷനിലേക്കു സ്നേഹത്തോടു സ്വാഗതം ചെയ്യുന്നതായി പ്രസിഡന്‍റ് സജിമോന്‍ ആന്‍റണി, സെക്രട്ടറി ശ്രീകുമാര്‍ ഉണ്ണിത്താന്‍, ട്രഷറര്‍ ജോയി ചാക്കപ്പന്‍, എക്സി. വൈസ് പ്രസിഡന്‍റ് പ്രവീണ്‍ തോമസ്, വൈസ് പ്രസിഡന്‍റ് വിപിന്‍ രാജു, ജോയിന്‍റ് സെക്രട്ടറി മനോജ് ഇടമന, ജോയിന്‍റ് ട്രഷറര്‍ ജോണ്‍ കല്ലോലിക്കല്‍, അഡിഷണല്‍ ജോയിന്‍റ് സെക്രട്ടറി അപ്പുക്കുട്ടന്‍ പിള്ള, അഡിഷണല്‍ ജോയിന്‍റ് ട്രഷറര്‍ മില്ലി ഫിലിപ്പ്, വിമന്‍സ് ഫോറം ചെയര്‍പേഴ്സണ്‍ രേവതി പിള്ള, ട്രസ്റ്റീ ബോര്‍ഡ് ചെയര്‍ ജോജി തോമസ്, കേരളാ കണ്‍വെന്‍ഷന്‍ ചെയര്‍ ജോയി ഇട്ടന്‍ മറ്റ് കമ്മിറ്റി മെംബേര്‍സ് എന്നിവര്‍ അറിയിച്ചു. കൂടുതല്‍ വിവരങ്ങള്‍ക്ക് സജിമോന്‍ ആന്‍റണി 862 438 2361, സെക്രട്ടറി ശ്രീകുമാര്‍ ഉണ്ണിത്താന്‍ 914 886 2655, ട്രഷറര്‍ ജോയി ചാക്കപ്പന്‍ 201 563 6294 എന്നിവരുമായി ബന്ധപ്പെടുക.
ഓര്‍ത്തഡോക്സ് വെക്കേഷന്‍ ബൈബിള്‍ സ്കൂളിന് ക്വീന്‍സ് ഇടവകയില്‍ പരിസമാപ്തി - ജോസഫ് പാപ്പന്‍
ന്യൂയോര്‍ക്: മലങ്കര ഓര്‍ത്തഡോക്സ് സഭയുടെ നോര്‍ത്ത് ഈസ്റ്റ് അമേരിക്കന്‍ ഭദ്രാസനത്തിലെ ബ്രൂക്ലിന്‍, ക്വീന്‍സ്, ലോങ്ങ് ഐലന്‍ഡ് ഏരിയയിലുള്ള ഇടവകകളുടെ ഈ വര്‍ഷത്തെ ഒവിബിഎസ് ക്ലാസ്സുകള്‍, ക്വീന്‍സ് സെന്‍റ് ഗ്രീഗോറിയോസ് ഓര്‍ത്തഡോക്സ് ഇടവകയില്‍ ജൂണ്‍ 30 മുതല്‍ ജൂലൈ 2 വരെ സമുചിതം നടത്തപ്പെട്ടു. സണ്‍ഡേ സ്കൂള്‍ ഏരിയ കോര്‍ഡിനേറ്റര്‍ മിനി കോശിയുടെയും ഒവിബിഎസ് കോര്‍ഡിനേറ്റര്‍ സൗമ്യ മാത്യുവിന്‍റെയും നേതൃത്വത്തില്‍ ഇരുന്നൂറോളം കുട്ടികളും അന്‍പതിലധികം അധ്യാപകരും വോളന്‍റിയേഴ്സും ഈ വര്‍ഷത്തെ ഒവിബിഎസ് അവിസ്മരണീയമാക്കി. വെരി.റവ. പൗലോസ് ആദായി കോര്‍ എപ്പിസ്കോപ്പ, റവ ഫാ.ജോണ്‍ തോമസ്, റവ ഫാ.സി.കെ രാജന്‍, റവ ഫാ.എബ്രഹാം ഫിലിപ്പ്, റവ ഫാ.ഡെന്നിസ് മത്തായി, ഇടവക വികാരി റവ ഫാ.ജെറി വര്‍ഗീസ് എന്നിവരുടെ സാന്നിധ്യം ഏറെ അനുഗ്രഹപ്രദമായിരുന്നു. ആത്മീയ ഉത്തേജനം നല്‍കുന്ന ക്ലാസ്സുകളും, പാട്ടുകളും, ആക്ഷന്‍ സോങ്ങുകളും, വര്‍ണ്ണാഭമായ ഒവിബിഎസ് റാലിയും മൂന്നു ദിവസം നീണ്ടുനിന്ന ഒവിബിഎസ് ക്ലാസ്സുകളിലൂടെ കുട്ടികള്‍ക്ക് ആസ്വാദ്യവും അനുഗ്രഹപ്രദവുമായ അനുഭവമായി മാറി.
കെ.എച്ച്.എന്‍.എ. ട്രസ്റ്റി ബോര്‍ഡ് നേതൃനിരയിലേക്ക് വനജ നായരും ഡോ. സുധീര്‍ പ്രയാഗയും മത്സരിക്കുന്നു - പ്രസന്നന്‍ പിള്ള
ഓഗസ്റ്റ് 17 മുതല്‍ 19 വരെ ന്യൂജേഴ്സി അറ്റ്ലാന്‍റിക് സിറ്റിയില്‍ നടക്കുന്ന ഗ്ലോബല്‍ ഹിന്ദു സംഗമത്തിന്‍റെ ഭാഗമായ പുതിയ ഭാരവാഹികളുടെ തെരഞ്ഞെടുപ്പില്‍ ട്രസ്റ്റി ബോര്‍ഡ് ചെയര്‍ പേഴ്സണ്‍ സ്ഥാനത്തേക്ക് ന്യൂയോര്‍ക്കില്‍ നിന്നുള്ള വനജ നായരും സെക്രട്ടറി സ്ഥാനത്തേക്ക് മിസോറി സെന്‍റ് ലൂയിസ് നിവാസിയായ ഡോ. സുധീര്‍ പ്രയാഗയും നാമനിര്‍ദ്ദേശ പത്രികകള്‍ സമര്‍പ്പിച്ചു. രണ്ടു പതിറ്റാണ്ടുമുമ്പ് ചിക്കാഗോയില്‍ നടന്ന കണ്‍വന്‍ഷന്‍ മുതല്‍ കെ.എച്ച്.എന്‍.എയുടെ സജീവ സഹയാത്രികയായിട്ടുള്ള വനജ നായര്‍ രണ്ടു തവണ ഡയറക്ടര്‍ ബോര്‍ഡ് അംഗമായും റീജിയണല്‍ വൈസ് പ്രസിഡന്‍റായും വിവിധ കണ്‍വന്‍ഷനുകളില്‍ ഉപസമിതികളുടെ സാരഥിയായി പ്രവര്‍ത്തിക്കുകയും കഴിഞ്ഞ രണ്ടു വര്‍ഷമായി ട്രസ്റ്റി ബോര്‍ഡ് അംഗമായി തുടരുകയും ചെയ്യുന്നു. ന്യൂയോര്‍ക്ക് സിറ്റിയിലെ പഴക്കം ചെന്ന ഹൈന്ദവ കൂട്ടായ്മകളില്‍ ഒന്നായ എന്‍.ബി.എയുടെ മുന്‍ പ്രസിഡന്‍റും നിലവിലെ ട്രസ്റ്റി ചെയറുമായ വനജ നായര്‍ ശ്രീനാരായണ അസോസിയേഷനിലും അയ്യപ്പ സേവ സംഘത്തിലും സജീവ സാന്നിധ്യവുമാണ്. ആകര്‍ഷകമായ പെരുമാറ്റം കൊണ്ട് സമൂഹത്തില്‍ ഒരു വലിയ സുഹൃത് വലയത്തെ സൃഷ്ടിച്ചിട്ടുള്ള ഇവര്‍ മെഡിക്കല്‍ മേഖലയില്‍ നേഴ്സ് പ്രാക്റ്റീഷണറായും യൂണിവേഴ്സിറ്റി ഓഫ് ന്യൂയോര്‍ക്കില്‍ പാര്‍ട്ട് ടൈം നേഴ്സിംഗ് അദ്ധ്യാപികയായും ജോലി ചെയ്യുന്നു. ട്രസ്റ്റീ സെക്രട്ടറി സ്ഥാനത്തേക്ക് വരാന്‍ ആഗ്രഹിക്കുന്ന സുധീര്‍ പ്രയാഗ കെ.എച്ച്.എന്‍.എ. മുന്‍ ജനറല്‍ സെക്രട്ടറിയും ട്രസ്റ്റി ബോര്‍ഡ് അംഗവും നിലവില്‍ എക്സിക്യൂട്ടീവ് വൈസ് പ്രസിഡന്‍റുമാണ്. ഫര്‍മസ്യൂട്ടിക്കല്‍ ഗവേഷണ രംഗത്തെ പ്രശസ്ത സ്ഥാപനമായ സെയിന്‍റ് ലൂയിസ് ആന്‍റി ബോഡി റീസേര്‍ച്ച് സെന്‍ററിന്‍റെ പ്രസിഡന്‍റും സി.ഇ.ഒ.യുമായ ഡോ.സുധീര്‍ പ്രതിരോധ ഔഷധ ഗവേഷണ രംഗത്ത് നിരവധി സംഭാവനകള്‍ നല്‍കിയിട്ടുള്ള ഒരു ശാസ്തജ്ഞന്‍ കൂടിയാണ്. ഔദ്യോഗിക കൃത്യ നിര്‍വഹണത്തോടൊപ്പം കേരളത്തില്‍ നിരവധി ജീവകാരുണ്യ പ്രവര്‍ത്തനങ്ങള്‍ ഏറ്റെടുത്തു നടത്തിവരുന്ന സുധീര്‍ സെയിന്‍റ് ലൂയിസിലെ ഓങ്കാരം എന്ന ഹൈന്ദവ കൂട്ടായ്മയുടെ സ്ഥാപക അംഗവും മുന്‍ പ്രസിഡന്‍റും കൊച്ചി ഹിന്ദു ഇക്കണോമിക് ഫോറം മെമ്പറും ഫെഡറേഷന്‍ ഓഫ് ശ്രീനാരായണ അസോസിയേഷന്‍സ് ഓഫ് നോര്‍ത്ത് അമേരിക്കയുടെ ഇപ്പോഴത്തെ വൈസ് പ്രസിഡന്‍റുമാണ്.
